%% الساعه 2:00 الظهر %%
من اول ما ردو البيت امس فليل و عقب ما خبرته امه عن اليازيه و هو مب مطمن ... و اللي اكثر كان موتر اعصابه شوفة محمد ... كان حاس و متأكد 1000 بالميه انه بينه و بين اليازيه شي ... و اللي اكثر زاد شكوكه نظرات المريبه محمد له و هدوءه الزايد عن حده ... من غير نغزات سعيد ربيعه اللي دوم ينبهه انه هالبنت ما تباه ...
في هاللحظه يت ع باله امل ... محد غيرها يقدر يشفي الغليل اللي بداخله و تريحه من شكوكه اللي كل ما ياها و تزيد فمافي حل غير انه يرمس امل و يفهم منها شو السالفه بالضبط ... فكر يأجل السالفه الين عقب المغرب لكن شو اللي بيصبره الين ذاك الوقت و على طول غير وجهته و اتجه صوب بيت ابوه ...
|| في بيت عبدالله ||
امل كانت توها واصله البيت و اول ما دشت حجرتها ربعت صوب الكبت و ظهرت موبايلها تجيك ع المكالمات ... طافن اربع ايام بدون لا ترمس سعيد حست انه هالاربع ايام طافن جنهن اربع سنين من زود ما هي كانت متولهه عليه ... ظهرت الموبايل من الكبت و اتسعت ابتسامتها و هي تشوف خمس مسجات واصله و اكيد سعيد اللي مطرشنهن ... عقب ما قرت المسجات و بدون تردد ردت اتصلت به ... ثواني و رد عليها سعيد ...
سعيد: هلا والله ... توج حسيتي؟؟
امل: اهلين ... اسمحلي سعيد ماقدرت ارمسك قبل ...
سعيد: و الحين؟؟
امل: امممممم ... شوفة عينك ...
سعيد: ولهتي عليه؟؟
امل: اكييييد ... ما يبالها رمسه ...
سعيد: هههههه ... انزين ماعليه الغاليه ... الظاهر نسينا عمارنا و نحن صيام ...
امل: كله مني جني مب شايفه خير ...
سعيد: هههههههه ... خلاص برايج ... اتصلي بي عقب ... بغيتج ف موضوع ضروري ...
امل: ان شاء الله ... يالله مع السلامه ...
سعيد: مع السلامه ...
بندت امل عن سعيد و هي حاسه انه احياه ردتلها عقب ما سمعت صوته ... و ف نفس الوقت الفضول ذابحنها على السالفه اللي يبا يرمسه فيها ... يا ترى شو بيقول لها؟؟ و شو بتكون ردة فعلها للي بيقوله ... تمت تفكر شو ممكن تكون هالسالفه لكن هالشي مب سهل ... ردت الموبايل مكانه و ظهرتلها ثياب و فوطه ... توها يايه بتدش الحمام و الا ناهد تدق عليها الباب ... حاست بوزها و هي تسمعها تزقرها و تدق الباب بالقو ... سارت امل صوب الباب و فجته ...
ناهد: ساعه الين تفتحين؟؟
امل تنهدت: كنت بدش الحمام ... شو تبين؟؟
ناهد: اخوج يترياج تحت ... و لو سمحتي يا ريت تقوليله انه هاي أول و آخر مره اشوفه ف بيتي ...
امل بدون نفس: ان شاء الله ... اي اوامر ثانيه؟؟
ناهد ما ردت عليها و سارت عنها صوب حجرتها ... اما امل تأففت بضيج و ظهرت من الحجره سايره تحت ... كانت متأكده انه منصور اللي ياي و اكيد الموضوع يخص اليازيه ... دشت عليه الميلس و يت يلست عداله ...
امل: شو السالفه هالمره؟؟
منصور: بسم الله علينا ... الناس يسلمون اول ...
امل: افففففف منصور هات من الآخر ولا تيلس تحشرني ... بروحي مصدعه و مرت ابوك رافعتلي ضغطي ...
منصور: هههههههه ... الله يعينكم ...
امل: انزين يالله ارمس خصنا ...
منصور: امممم ... ابا اسألج سؤال و اباج تجاوبيني بصراحه و بدون لف و دوران ...
امل تسارعت دقات قلبها: اسأل انزين ...
منصور: ابا اعرف شو بين اليازيه و محمد؟؟
امل تنفست الصعداء لانه الموضوع ما يخصها و قالت باستغراب: ما بينهم شي ... شو بيكون بينهم يعني؟؟
منصور: شوفي امول ... انا الحين ارمسج بالطيب ... لا تخليني اغير طريقة تعاملي وياج تراها ما بتعيبج ...
امل: والله عاد ماعندي غير هالرمسه ... تباني اجذب عليك عشان ترتاح؟؟
منصور: اباج تقولين الصدق ... ترى الدس و الخش ما ينفع ويايه ... مصيره كل شي بينكشف ...
امل: والله عاد اذا تبا غير هالرمسه سير اسأل حرمتك ... انا من زمان ما سرتلها ولا ابا اسير ... تفاهم انته وياها ...
منصور بانفعال: و بعدين وياج؟؟ يعني لازم الواحد يصرخ عليج و يهازبج عشان ترمسين ...
امل وقفت و هي مغيضه و قات بانفعال: تراك مصختها وايد ... هذا يزاي اني عاطتنك ويه وايد ... قلت لك ماعرف عنها ... تبا سير اسألها هي ...
و على طول توجهت امل صوب الباب ولا التفتت لمنصور اللي تم يزاقرها بدون فايده و صفقت الباب وراها بالقو ... تنهد منصور بضيج و الغيض عنده واصل حده ... ظهر منصور من بيت ابوه و على طول توجه للبيت ... طول الطريج و الافكار توديه و تييبه و كل ما تذكر محمد و اليازيه يعض على شفايفه من الغيض و هو مصمم يسوي اللي في راسه اليوم قبل باجر ...
*~*~*~~*~*~*
%% السبت 9:30 فليل %%
من عقب ما صلت العشا و التراويح و هي يالسه ع البلكونه تراقب سكون الليل ... كل هذا على امل انه مشهد امس يتكرر مره ثانيه و تكحل عينها بشوفته ... رفعت جم كندورتها و تنهدت بعمق و تطالع الساعه اللي تشير الى التسع و نص ... طافت نص ساعه و مازالت في الانتظار ... الظاهر السالفه بتطول و مب كل يوم يعيد اليوم اللي قبله ... نشت من مكانها بترد الحجره لكن صوت سياره تقترب من بيتهم لفت انتباهها ... عكس ما كانت تتوقع هالسياره مب سيارة محمد ... شكت انه هالسياره مب غريبه عليها ... تمت لحظات تترياهم ينزلون من السياره ... اعتفس ويهها و هي تشوف منصور نازل من السياره و شكله يرمس في الموبايل ... و اللي اكثر قهرها انه بدال ما يتوجه على طول صوب الميلس تم يتلفت جنه يدور شي ... و قبل لا تتجه انظاره صوب بلكونة حجرتها دشت بسرعه عن يشوفها ...
في الطرف الثاني ... صوب القراج بالتحديد ... لاحظ منصور طيف اليازيه و هي داشه الحجره ... مع انه ما كان متأكد من اللي شافها بس كان عنده شك انه اللي جافها هي اليازيه ... موقفها هذا زاد شكوكه شكوك ... حس انها كارهتنه من الخاطر ... لكنه من نفسه كان معزم ع الشي اللي يجول ف خاطره لو شو تسوي ...
سعيد: حووووه وينك ...
منصور انتبه لسعيد اللي كان يرمسه من الصبح و هو مسوله طاف: هاه وياك وياك ...
سعيد بخبث: ويايه ولا ويا اللي ..... احم احم ...
منصور: اقول لك شي ... يالله فارج ...
سعيد: هههههههه ويا ويهك ... خلاص برايك خلك ويا احباب القلب ...
منصور: يالله باي ...
سعيد: حافظنك الله ... و هالله هالله بالعروس لا تشردها ...
منصور تنهد بضيج: انته فارج و ما يخصك بالسالفه ... مب منك من اللي يسويلك سالفه و يخبرك عن اسراره ...
سعيد: افاااااا هذا و انا وياك عشرة عمر فرقت بيننا بنت ... بس مب منك من انا اللي مخلي اشغالي و ياي اهذرب وياك ...
منصور قاطعه: الله و الاشغال عاد ... اللي تسويه انته تسميه شغل ...
سعيد بخبث: دام من وراه مكسب اكيد بسميه شغل ...
منصور تنهد: ماقول غير الله يعين بنات الناس عليك ...
سعيد: ههههههههه ... آمين ...
منصور: المهم بخليك الحين و بتفاهم وياك بعدين مب حلوه انا ف بيت الناس و يالس اهذرب وياك ...
سعيد: خير ان شاء الله ... مع السلامه ...
منصور: مع السلامه ...
بند منصور عن سعيد ... للمره الاخيره التفتت صوب حجرة اليازيه و سار الميلس الخارجي وين الرياييل موجودين ...
*~*~*~*~~*~*~*~*
%% الساعه 10:50 فليل %%
عيزت من كثر ما تتصل و تحصل تلفونه مشغول و ان ما كان مشغول ما يرد عليها ... هاي اول مره يسويها فيها ... تنهدت بضيج و فرت التلفون ع الشبريه و هي تفكر بعلاقتهم اللي ما طاف عليها غير عدة شهور ...
فجأه انقلب مزاجها و حست انه كل اللي بينها و بين سعيد غلط و لازم ينتهي في اقرب وقت قبل لا يصير شي تندم عليه طول عمرها ... حست بالاشمئزاز من نفسها و اللي تسويه ... بس في نفس الوقت كان عندها احساس انه نهاية هالعلاقه تعني نهايتها ... خصوصاً انه سعيد يعرف اخوها و هالشي مب سهل تتوقع شو بتحصل من وراه ... يا اما انه يخليها ف حالها اذا ما بغته بحكم انها اخت اعز ربعه ... او انه يخسس فيها و يخبر اخوها عن كل شي ... و ساعتها محد بيندم غيرها هي ...
انقطع حبل افكارها بمجرد ما رن التلفون ... تسارعت دقات قلبها و هي تشوف رقمه ظاهر على الشاشه ... و ردت عليه عقب فتره تردد ...
امل: هلا ...
سعيد ببرود: اهلين ...
امل: شحالك؟؟
سعيد تنهد: الحمدلله ع كل حال ... و علومج؟؟
امل باستغراب: تمام ... بس ليش هالتنهيده؟؟
سعيد: لا ماشي ...
و عم الصمت فتره ...
امل: ليش ساكت؟؟ شي مضايجنك؟؟
سعيد بهدوء: ولا شي ...
امل: سعيد والله ترمس ... اسلوبك ويايه مب عايبني ...
سعيد تنهد بعمق: حبيبتي ولهت عليج ...
امل: و انا ولهت عليك اكثر ...
سعيد: فديت روحج ... حبيبي طلبتج قولي تم ...
امل: افا عليك تم ...
سعيد: ابا اشوفج الحين ...
امل انصدمت: شوووه؟؟ شو الحين انته تخبلت؟؟
سعيد: يالله عاد والله متوله عليج مووووت ... حسي فيه شوي ...
امل: سعيد اذا انته ولهت عليه انا ولهت عيك اكثر ... بس كيف بشوفك الحين؟؟
سعيد: انا بييج ...
امل: لالالالا ... مافيه ع المشاكل ...
سعيد: ليش؟؟ هلج في البيت؟؟
امل: اممممم ... ابويه و مرته يمكن محد ...
سعيد: عيل ليش خايفه؟؟ صدقيني ما بنطول ولا حد بيدري ...
امل: ..........................
سعيد بحماس: هاه شو قلتي؟؟
امل: و اذا حد شافني و انا طالعه او داشه شو بيقولون؟؟
سعيد: دامج ويا بو عسكور لا تحاتين محد بيشوفج ...
امل حست بدقات قلبها تتسارع: والله ماعرف شو اقول لك بس خايفه ...
سعيد: لا تخافين دامج ويايه ... صدقيني محد بيدري ...
امل: انزين خلاص ... بس ما نطول ...
سعيد: افا عليج ما طلبتي الشيخه ... بس عطيني ربع ساعه الين اوصل فريجكم و يوم بتصل بج طلعي ...
امل: ان شاء الله ...
سعيد: يالله حبيبي اشوفج على خير ...
بند سعيد عن امل اللي توجهت للكبت على طول طلعتلها لبس عدل و بدلت و لبست شيلتها و عباتها و يلست تتريا اتصال سعيد عشان تظهر ... دقايق و يتصل بها سعيد عشان تظهر عقب ما تأكد من خلو المكان من الماره و بند عنها ... حاوت تستجمع قواها عشان تقدم ع الخطوه اللي بتسويها ... ظهرت من حجرتها و هي تتلفت يمين يسار عن تشوفها عفرا و هي ظاهره و بأقصى سرعه نزلت و ظهرت من البيت متجهه صوب سعيد اللي يترياها بسيارته بس شوي بعيد عن بيتهم ... ظهرت عقب ما تأكدت انه محد شافها ... و هذا طبعاً حسب اعتقادها لانه في مكان شوي بعيد عنها كانت في عيون تراقبها و هي ظاهره ...
*~*~*~*~~*~*~*~*
%% الساعه 11:45 فليل %%
من امس و هو يترياه على نار و الين الحين ما يا الشقه ... دب الشك و القلق لنفسه ... من امس تلفونه مغلق و من عقب ما ظهر عنه ما رد ... رغم انه احتمال انكشاف اللي يسوونه صغير الا انه ما استبعد هالشي ...
في هاللحظه انفتح باب الشقه معلن عن وصول عمر ... كان باين من شكله انه مغيض ... الشي اللي شكك ناصر انه شي جايد صار وياه ...
عمر بانفعال: عقب اللي سويته بعد لك ويه تيلس هني؟؟
ناصر ببرود: ليش شو صاير؟؟
عمر باستهزاء: سلامتك ... ما صار الا الخير ...
ناصر: طز جانك ما تبا تقول ... لو شو يصير ما يهمني ...
عمر: عيل لا تفكر اعطيك فلس من اللي خذته امس ... اوكي؟؟
ناصر ضحك باستهزاء: لا حبيبي ... النص بالنص مثل ما اتفقنا ... ماسوي شي ببلاش ...
عمر: هالمره راحت عليك ... عوضني عن الفلوس اللي انخصمن هاييج الساعه تعال قول هالرمسه ...
ناصر بانفعال: اي فلوس هاي اللي ترمس عنها؟؟ عمور لعبتك هاي ما بتمشي عليه ... لا تتحسبني نسيت الاتفاق من بيننا ... اعرف لشو تخطط ... فأحسن لك بطل هاللعب ...
عمر: انا الحين ارمسك ف سالفه ثانيه لا تييب هالسالفه الحين ... تدري انه بسبب تأخيرك الريال خصم من الفلوس؟؟
ناصر و هو يطالع عمر بنص عين: و منو هالريال اللي خصم منهن؟؟ انته ولا غيرك؟؟
عمر بنقمه: حدك عاد ... انته الغلطان و الحين تبا تعق عليه الغلطه؟؟ و بعدين لو ابا آخذ شي ما بسويه بالدس و بخاف من واحد شراتك ... حط ف بالك هالشي عدل ... و الحين لو سمحت فارج مابا اشوف ويهك الحين ...
ناصر: انزين انا ساير ... بس لا تتحراني بخليك ف حالك ... و ان عرفت انك مديت ايدك على شي ما يخصك فيه والله لا تشوف شي ما شفته بعمرك ...
عمر بدون نفس: تروم يا ولد ..... ولا خلني ساكت احسن ...
الين هني و الغيض عند ناصر وصل الطبلون ... ظهر من الشقه و صفق الباب وراه و هو ينافخ من الغيض ... ركب سيارته و حرك على طول ... هو من يوم جاف خالد ياي الشقه امس و هو حاس انه عمر يخطط لشي من وراه و زادت شكوكه اكثر من اسلوب عمر وياه اليوم ... الحين بس تأكد عمر لشو يخطط ... لكنه مستحيل يسكت عنه و مافي حل غير انه يلعب نفس لعبته و يضمن مستحقاته قبل لا يقضي عليهن عمر!!
*~*~*~*~~*~*~*~*