منتدى بريدة - ليس المهم كما يقولون ( اهم شيءالصحة ) وانما المهم !!!!

ياطيور الطايره سلميلي على ربعي في منتدى بريدة وكل عام وانتم بخير ..

كثير من الناس ماسك بسنونه على هذه العباره ( اهم شي الصحه ) ( اهم شيء العافية ) وهذا خطا ووهم وهم من جنب الصحيح مسافة 900 كيلو متر .

الصحيح والحقيقة انه اهم شيء ( استشعار الصحة ) وليس الصحة بدون استشعار .

كم من واحد متعافي 100 % لكنه ماستشعر العافية والصحة .. وحياته جحيم ماغير يقطع وينتف ويصقل ويرمح وجه وحياته كلها عبوس قمطرير ياحياة الشر والكسافة والغرابيل حتى النوم ماينام حتى يكسف بالوساده ياما حطها يمين ياما حطها شمال ياما عوجها؟؟ ايامه كلها راكبها ابليس لو تباع بحراج الرخوم على صحن موتر عراوي ماتجيب ريالين ولا تلقى السوام ..

المضحك ههههههههه لما تساله عن الصحه يرد وعيونه ناطه مترين ( الحمدلله الصحة تمام ) وينك ووين التمام والعافية ومازولا وانت عايش بصبخة قلابيات مااسشعرت اللي تقوله وعشت سعادته .

اكيد كل من صبح بالمحاكم والحقوق شاكي فلان وفلنتان وجه وجه ابن فهرة ماغير يمشي ويهز شحمة اذنه ويلوي خشمه باصيعه ( والله والله وانا ولد ابوي ههههه الا ولد ابليس وابو زنه ) هو متعافي صح لكن خسارة لم يستشعرها ولو اشتشعرها لحمد الله عليها .

اكيد (من يوم يصبح وهو يومه ديدينه افلان فيه وافلان مافيه وافلان به وافلان مابه ) هو متعافي صح لكن ياخساره لم يستشعرها ولو اشتشعرها لحمد الله عليها وحفظ لسانه وقال هي راس مالي .

اكيد ( من حياته حياة الجاهلية تحت مرتبة السيارة العجرا والسكروب والمشعاب ومفتاح العجل وحياته حياة ابليس ) هو متعافي صح لكن ياخساره لم يستشعرها ولو اشتشعرها لحمد الله عليها ومسك دربه وقال هي راس مالي .. اكيد واكيد وقس بمئات الامثال على امة مالها نصيب من عافيتها الا الاسم

اذا خلاصة الكلام وهذا موضوع حصري ماسبقني اليه احد لا في الاولين ولا الاخرين احد هو ( استشعار الصحة ) وليس ( الصحة وجدها ) لان وجودها بلا اسشعار مثل عدمها .
يبقى استشعار العافية هبه من لله وصعب تجي بتحريك ريموت من قبل الانسان .
مع تحيات قلم صريخ .