أبو فارس .. نقل مدارس .. !!
 

السلام عليكم و رحمة الله ..

قدر الله و جعلني أنثى .. تعيش في المملكة العربية السعودية ..

و من عامة الشعب أيضاً ..

وهذا سبب كافي جداً .. لأخبركم أني لا أمتلك سيارة خاصة ..

ولا يسمح لي بقيادتها ..

لكن .. بين الفينة و الأخرى .. " يبخون " علينا من المسكنات ..

حتى نسكت و نرضى .. هه !!

ماعلينا ..

المهم أنني تورطت _ و عدد لا بأس به من زميلات العمل _ بتعذر وسيلة النقل ..

وحيث أنه يصرف لنا بدلات ( نقل )من المعازيب .. إذن : كل وحدة تبلع العافية ..

و تبحث لها عن " نقل " يتناسب مع كينونتها .. !

فاجتمعنا ننقب و نبحث عن ( نقل ) بمواصفات قياسية ..

فكل واحدة منا .. أخذت قلم و ورقة مفكرة .. و جعلت تكتب شرطها .. هه !!

فمثلاً ..

1. سيارة جديدة واسعة .. و مكيفة !

2. سواق سعودي .. ذكر مسلم عاقل بالغ قادر فاهم ..

3. مــــــــــــايسرع .. * شرطي الخاص *

4. يحترم المواعيد .. * كثر منها *

و غير ذلك ..

بدأت عندنا حالات الطوارئ .. و تحولت جوالاتنا إلى E.R

وذلك لإمتلائها بأرقام .. أرقام .. أرقام .. مسجات و بطاقات اعمال .. هه !!

و البركة في صديقاتنا و معارفنا .. فزعــــــــــــات عسانا ما نعدمهنش .. :) :) :)

لااااا إله إلا الله ..

من بيدق على كل ذولا .. :( !!

استعرضنا الأرقام ..

أبو خالد نقل سعودي
<<< رفيقنا بالمنتدى .. كااااااااااااااك

ابو محمد نقل
<<< وبالمساء يبيع قرصان ..

ياسر نقل فلسطيني
<<< عووووذه .. قطيعه مانبي متوحشات من هالجنسية !

نقل سوداني 1
نقل سوداني 2

<<< ياحول مالهم أسماء ؟!

شركة نقل .. وكسي
<<< إذا غيروا اسمهم و خففوا سرعتهم .. ركبنا معهم .. هه !!

شركة نقل .. راحة الطريق
<<< راحة طريق .. بس تعب جيوب .. ولازم 12 بنت .. من وين نأمن هالعدد !!

:
:
:

طلبنا أول رقم و كان نقل مصري الــ g ـنسية ..
-السلام عليكم .. تنقل مدرسات يا أخوي ؟
-و عليكم السلام و رحمة الله و بركاته نعم يا أختي الفاضلة أنقل مدرسات إن شاء الله ..

* الصراحة إني لان قلبي من قوة إيمان هذا المصري الله يجزاه خير ..
و كدت أرى دمغة السجود على جبينه .. سبحان الله الورع باين بالتليفون !!

- طيب بكم ؟
- لن أحدد بارك الله فيكي أنتم بأه حددوا و شوفوا ..

* وااااو .. والله انه انسان خيّر .. من جد أمي داعية لي *

- طيب وشي سيارتك ؟
- مرسيدس موديل 40 قبل الميلاد .. و مافيهاش مكيف للأمانة .. !

* ايه عادي .. أصلاً فرصة نسوي ساونا بالطريق .. هه !

- طيب ممكن تعطينا صورة من الإقامة .. و مكان عملك و اسم كفيلك ؟
- إيه ؟ أولي تاني كده ؟

* بسم الله ؟! وش به ذا المسلسل المصري ؟!

- اسمعي بأه أنا لي بالصعوطية خمسة و تلاتين سنة .. و معروف بين كوووول اهل
بريدة .. آل إيه ؟ عاوزه إيه يختي ؟ بأولك إيه .. خلاص .. موش حــ وصّل حد ..
ماشي كده ؟!

<<< مازالت الكشرة مهجوجة .. أثر الإنقلاب المفاجئ !!

- وع من زينك يا لطعمية .. والله لأبلغ عنك البلدية .. عشان تعرف ترفع صوتك علي .. ويعه بلا ويعه .. عندي 564546 رقم سواق غيرك .. تحسبنا بنموت ؟!

* طبعاً هذا كله بعد ما قفلت الخط .. هه !!


******************

هذي سيارة أبو محمد .. سواق سعودي .. تجاوز عمره 66 سنة ..
http://www.mitchell.derbycounty.co.uk/schoolbus.jpg

ولو .. كشخة هالشيبة .. هه !

بس مشكلة مامعه محرم ..

أمممممممم

الشكوى لله تراه شايب يعني اطمئنوا يا بنات .. لو تنفخ عليه طاح .. !

ركبنا معه أول يوم .. بعد ما اتفقنا على رسم التوصيل ..

الرجل محترم جداً .. و سيارته مهضومة ..

صحيح إننا كأننا ( نكته تجوب الشوارع ) .. بس ميخالف ..

أهم شي نوصل الدوام السعيد .. هماه ؟!

أكثر شي أزعجنا بهذا النقل .. هو سرعته الجنونية .. و مع الدوار يمشي على كفرين ..!

بصراحة مادري ليه الشياب يحبون السرعة .. !!

أجل وش خلوا للكامري .. أبو خشم رملي !

و فضلاً عن ذلك .. لعب في حسبتنا من كثر ما يمسك " بريكات " ..

لدرجة أن وحدة من البنات حامل .. و خفنا عليها تجهض أو ينقلب البيبي .. !!

الله يجزاه خير .. ما ينفع .. أبد ..!!

جرب اللي بعدو .. !


******************

* أبو مرزوق *

ياهوووووو اسمه الصراحة رهيب .. ذكرني بموضي الشمراني و الشلة ..

ابو مرزوق يجيب معاه محرم ..

كل يوم شكل ..

مرة وحدة عصلا .. غبية

و مرة دبية .. تهبل خفيفة دم ..

و مرة عجيّز .. ما تسمع .. وبس نايمة .. أو الله محرم !!

و من أول ما استقلينا سيارته .. ( جمسن حمرا تلاعب الهوى )

و انا قلبي قارصني ..

أممممممممممم

غير أنه على طول مشغل ( أغاني ) .. و لاهو معتبر اللي معاه .. شي !!

حتى شكل أذانيه .. ما يطمن .. كبار و دائرية .. كأنها طيران .. !

و عينه زايغة .. !!

ركبنا معه يوم .. و من بكرا .. جاء بسيارة فورد فيكتوريا مادري من وين زارفها ..

ولو ما عرفناه من أذانيه .. ماكان ركبنا معه .. قال إيش ؟؟ الجمس الملكي عطلان ..

و اضطر أنه يوقفنا بالشارع بوسط الطريق .. و ينقلنا بسيارة ثانية ..

وحنا مثل الشغالات المهربات .. ماغير نهزهز روسنا .. ماندري ليه كذا طيب ؟!

آه .. يا عيشتن قشرا ..!

من عقب العز .. صرنا " ترانزليت " تحت هالشموس !!

ومازالت الاتصالات قائمة على قدم .. و عظم .. هه !!


________________

رسالة لكل من تسمح له نفسه ( وهو قادر ) بــ ترك محارمه عرضه لهؤلاء ..

اتقوا الله في بناتكم .. اتقوا الله في أماناتكم

كيف تنام و أنت ( الرجّال ) .. وما تدري عن اسم الرجل اللي ينقل أختك .. !

الدنيا مازالت بخير .. نعم

و أهل الذمة و الامانة موجودين و باقين .. نعم

لكن الحرص واجب ..



اللهم هل بلغت ؟!

:for2: استاذتي كاتبه موضوع :for2:

لاتعليق لدي لان استاذتي هي اللي كاتبه الموضوع فانا طالب اقراء فقط !!


<< مبسوط مايدري وراه

المشكلة القرى لازم سواق


لا واللي عندنا يقول ماراح ادخل الحارة تطلعين براس الشارع هالعجاز عساه للماحي


يعني تخيلي بالهفجور قايم انا وابو الشباب وقاعدين نتحراه براس الشارع علمه


لا وستين كيلو وياخذ الف عساه مايتهنا بهن قولو اميين


لذلك اقولك اللي في القرى لازم نقل

وكذلك اذا صار المسؤول دوامه بعيد يعني صعبة يطلع ويشيله ويرجع


يعني فيه ظروف كثيرة تخلي صاحب البيت يسلم اهل بيته لهسواقيين

بس أن شاء الله ربي يفرجه ونصير نسوق لو دباب

اختي ام هشام <<<<<< اللي مايعرف اسم ولدي ما اعرف اسم ولده خخ

ماعلينا 00المهم


بالامس كنت عازم نفسي عند ابوي الله لا يحرمنا منه ويعطيه طولة العمر

وبعد صلاة المغرب اجرى اتصال بواحد يودي ويجيب ومعه مرته عشان يروح باختي تدرس ورى الشمس بخمس كيلو

تصدقي اننا خمس رجاجيل كلهم شلولخ وكل واحد ياقع على زنده الحمار اعزكم الله بس ماعطانا وجه لانه يدري بالبير وغطاه ولا احد قايم من فجر الله يودي عرضه الى ماوراء الجبال خخخخ

صراحة مأساة يعانن منها خواتنا

الله يعينكن

شكرا لك واعانك انت واختي والبقية

هههههههه... والله موضوعك يمس الوتر الحساس ..

الله يعيننا وياك ... عاد تصدقين لو يخلون على الاقل الحريم يوصلن حريم وتختصر القيادة النسائية على ذلك كان سلمنا من كثير من المشاكل خصوصاً من أمثال ابومرزوق ..مع اني ضد قيادة المرأة الا اني الآن أقول خذوا هالاقتراح السابق فقط ...

اهلا بك استاذ ابو خالد و مشكور على الإطراء ..

ممكن نفكر بــ حل ؟

ترى عن نفسي و الله ما اسوق ولا أفكر أسوق بحياتي ..

عقب حادث جرى علينا العام الماضي .. الله لا يعيد الشر على المسلمين ..

يعني تبت إلى الله توبة نصوحا ..

بس اعتقد لو المؤسسات الحكومية تأمن للموظفات نقل خاص ..

مو أحسن ؟

مثل الموجهات التربويات .. عندهن جموس تحت الطلب ماشاء الله عليهم ..



حياك الله استاذ ..

الذاهبــــــــــــــــــــة فديت قلبتس...

ذكرتين بحالنا اللي مضى..تصدقين مافي أحد ببريدة ماركبنا معه..انواع اللعنه...

وومارتحنا الا بالسواق..... بس وين اللي يقتنعون... قسم انهم مهزلة هالنقل وخرابيطهم..

فشلتني :)

شوف استاذ عاشق بريدة ..

ربي ماخلق لي قلبين في جوفي .. ما أقدر أكتب مواضيع و أردرد .. !!

لذلك أنا اخترت أني انشغل بالردود .. و أترك المواضيع للكتاب الحقيقيين ..

وعموماً ..

لي موضوع يطرح كل 6 أشهر .. و تقدر تبحث عن مواضيعي السابقة

في معرفي السابق ( الذاهبة ) بدون مد ..

و تراك بتلاقي تفشيلات واجد .. يعني ردود لي يوم أنا بزر توني ما انفطمت .. هه !



و عساك دوم مبسوط ان شاء الله .. و الجميع ..

الله يكون بعونكن يالحريم وسيلة المواصلات مشكله
وين الامين
وين الملتزم بمواعيده
وين ابو سعر مناسب
وين ابو اخلاق مناسبة
وين العاقل مايسرع
وين القنوع اللي ياخذ ثنتين وانتي الثالثه
وين ووين ووين الله يرزقكم بقرار يخليكم تصفطون الكامري عند الباب

7
7
7
7
7
7
7
7
7
http://www.mitchell.derbycounty.co.uk/schoolbus.jpg

حليل هالباص بس ماكنه قصير ومدربح ويمشي جميع شكله حق طالبات محو الامية

هلا بك يا غالية

أم ارجوان بقول لك شي ..

تعرفين حنا السبب في استغلال هالناس ؟

اكيد أنتي تعرفين كم بيكلفك لو تستقدمين سواق خاص بك ؟

أو أحد من البنات اللي معك بنفس القرية

لو كلكم جبتوا سواق واحد .. ترى راتبه 600 ريال أو أكثر شوي

و قدرتوا تدبرون اموركم ..

بس مشكلتنا .. مانعرف ندبر ..

خلاص هو قال 1000 يعني 1000

شوفي الحين الشغالات بكم اجارهم ؟!

3000 ثلاثة آلاف ريال !!!!!!!!

يعني ست أضعاف راتبها الحقيقي

و مع ذلك .. حنا نقول إيه ميخالف ..

مادام كل شي عندنا ايه ميخالف .. خلاص أكيد كلن بيلعب علينا .. !!

حياك الله حبيبتي ..

بقولك قصة عن الناقلين السعوديين .........

هذولا يالذاهبة هم اكثر ناس يتزوجون ثانية وثالثة
واحياناَ مسيار<<<< لاعبين بالقش :36_1_3[1]
عايشين على التلقيط من هالمدرسات او الموظفات الأرامل والمطلقات ..!




اعرف رجل خمسيني ..يسولف لي عن تجاربه خلال 15 سنة مع نقل المعلمات خارج بريدة
يقول تزوجت 4 مدرسات بتراب الفلوس كلهن يوافقن على زواجي منهن بمهر ماشي الحال لأنهن يبغن رجل محترم ..!! وباقي منهن زوجتين على ذمتي واحدة مدرسة والثانية كاتبة..<<<<انواع الروقان وحنا قاعدين على واحدة ..!
وش عليه مراهق بالخمسين (مثل حسينوه ) !!:5[1]:
كل ما الاقيه بمناسبة يقول للحين انت موظف ماتقاعدت مبكر ..؟؟ اقوله لا للحين
مدري إلا هو قايل خخخخخخخخخخخخخخخخخخخخخخخ والله إنك ضايع تعال إلحق على عمرك
فلوس وتقدير ..ويحصل زواج من واحدة طارفة تبي رجل مالي هدومة..!


بصراحة يالذاهبــة ...أحياناَ (ترق لهاتي )...ودي اسوي مثله لكن وين اودي نفسي بين زملائي اللي اتمنظر عندهم وعامل ويني عند نفســي ...!

الخمسيني سواااق المعلمات ....إذا قلتله استحي وين اودي وجهي من اصدقائي ..!
يضحك كثير وتقطع مصارينه ...ويقول خلهم ينفعونك ..!

تصدقين يالذاهبــة بعد سردك الجميل عن واقع حال المعلمات ..جزمتيني انظم إلى عالم الناقلين :)
وش حيثنا من نأخذ نصيبنا ...!! بس الشيبان اللي يعددون ..؟؟



على فكرة مدري وش بلاك على الحريم السايكل ..؟؟:4_16_1[1]

شكرا لطرحك الذي اخرجنا من حالة اليأس والملل ..

اهلا بك استاذ أبو عدي ..

ترى عدي بطل العالم .. من مبطي ..

بس والله أنا أذكر حداكم اسمه ابو مازن .. ولا عاد ادري منهو ..

لا تواخذنا طال عمرك ..

والله يخلي لك الوالد .. و يخليك لــ عدي ..

و مبروك تعيين البنت ورا الشمس ..

ترى قريب بالحيل الحمد لله .. أشوى من بنت جيراننا طلع تعيينها بكوكب الزهرة

بس الظاهر مهب مداومه هناك ..

حياك الله ..

الذاهبة
سراحة معاناة الشايب ماتبنة والشاب بعد
لا عاد ابشرك انحلت كلها كم سنة وكل وحد وسيارتها بدون شايب وشاب واندونيسي
يلة من قدكن