العيال لا يدخلون (للبنات)

[الاصيلة]

السلام عليكم
وصبحكن اللة بالخير

أقبل الشهر الكريم شهر الصيام والقيام والغفران
وتعرفون ان الرجال عند أبطونهم
أنا لست طباخة ماهرة ولكن أعتدت ان ادخل المطبخ في ألاجازات ورمضان اللة يشرفة

ونبي نتعاون بالطبخات يابنات يعني كل وحدة ممكن تستفسر عن طبخة وما تبخل علينا باللي تعرف

المهم انا جربت مرة وطبخت المقلوبة بالدجاج
أهلي ذاقوها يقولون أتجنن لا وأبوي يقول طبختس أحسن من امتس
وبصراحة اعرف أنة يجامل لاكني أستانست

وياللة ما أبي أطول وشمرن يابنات سواعدكن
وجتكم المقلوبة


المقادير

دجاجتين بدون عظم
بصلتين مقطعة شرائح
حبتين قرنبيط او ما يسمى زهرة متوسطة الحجم
اربع حباة بطاطس مقطعة أرباع
فلفل اخضر بارد مقطع حلقات حبتين
اثنين مكعب ماجي
ملعقتين طعام بهارات مخلوطة
بهارات - هيل - فلفل اسود - قرفة او دارسين - قرنفل او مسمار
ثلاث كاسات ونصف رز بسمتي
زيت للقلي


الطريقة

يقلى كل على حده الدجاج والقرنبيط والبطاطس والبصل والفلفل الأخضر البارد
يوضع الجميع بعد القلي في صينية الفرن
يسلق الرز في ماء وملح والبهارات كلها حتى ينضج
يصفى الرز ثم يضاف على الصينية
يذوب الماجي والبهارات في كأس من الماء
يصب على الصينية مع مراعاة التوزيع المنتظم
تغطى بقصير ثم توضع في الفرن لمدة ساعة تقريبا على حرارة 350 فهرنهيت


وبعدها تطلع من الفرن وبالهنا والعافية
**ملاحظة**
هذة الوجبة تكفي 6 الى 8 أشخاص

والحلى بعدين وبالعافية

[الحنجرة الذهبية]

ابشرج ياختي اصيلة
اني اعاون والدتي بالبيت
وخاصه بالطبخ , لان خواتي الله يوفقهن تزوجن وما بقي احد يعاون الوالده الا انا
والمقلوبه مع احترامي كلن يعرفلها مثل طبق البيض
لكن بودنا الطبخات الرمضانيه ( الحركات والتكتكه)
واخير مشكوره وموضوع جميل وانا سأتابع هذه الصفحة حتى تمدحن امى عند خواتي
:D

[غالي الأثمان]

انا عندي طبخه

البيض المسلوق

هو وضع بيض (عدد البيض على كيفكن) في ماء يغلي
وتخلينه ربع ساعه وبعدين تطلعينه وتقشرينه و بعدين على كيفك
تبين تحطينه بسندويشه تبيني تقطعينه بصحن على راتك


لكن إذا جيتو للطعم اقول لكم وشتاكلون معه عشان تضبط الأكله

بيض مسلوق (هذا أساسي)
معه كراث
معه هبسبوسه مليانه شيره (السكر المذوب)
معه ميرنا حار
بس على شرط مافيه راحه بينهن والله إن تدعون ....مادري لي ولا علي

بس قبل كل شيء إحجزو أسره بالمستشفى
مثل ماحصل لأهل الأصيله عقب ماأكلو المقلوبه وأبوه قاله حلو طبخك
قبل من الدوخه اللي جته عقب ماأكل


تراي أمزح الأصيله بس اهم شيء ظبطي لأهك الأكله اللي قلته لك عشان يطردونك من البيت ====>الرجاء بدون زعل

[بقايا نزف]

هلا وغلااااااااااااااااااااااا

طبق اليوم...........حلى العجازييييييين.......

والله مقاديره دايما متوفره لكن الحشو يتعب

المقادير:

من الفريزر جيبي علبه تمر سكري

باكت بسكوت شاي مطحون يضاف اليه ملعقتين طحينيه

حليب مركز(نستله)

مكسرات للتزيين..ورق زينه

الطريقة:

تشق التمرة من النصف بحذر وتزال نواتها(عبسته) ويوضع بداخلها


البسكوت مع الملعقتين طحينييه .وبعدين نسكر التمره

ونحطه بورق تزيين ونصب فوقه حليب مركز(نستله) ونرش المكسراااااات

................ايه ترى تكفي اهل الحاره كله لالا قصدي اعضاء منتدى بريده

وبصحتيييييييييييييين والف عافيه

محبتكم.....

بقايا نزف

[ALI 9]

السلام عليكم ورحمة الله وبركاته

الظاهر الطبخات خاصة للبنات

لكن اذا صاروا العيال هم الي يبي ياكلون عادي انتدخل

اغديكن فهمتن

ايه غالي الاثمان الله يهديك

ليش تفضح طبخات الشباب السرية

اقول بقايا نزف اشهد ان الطبخ مهب لمك

الحنجرة الذهبية
الله يخليك لوالديك ويخليهم لك

وهذا خبرنا بالحريم ( ايقاله شايب)

وسلميلي على الجهراء وكل الفريج

الاصيلة
اقترح الطبخة مثل ما قالت الحنجرة تكون رمضانية
عدل كلامي والا مو عدل


وهذا مو قع تلاقون فيه الي تبون


تحياتي
المطنون

الطبخ والنفخ (http://www.cookweb.cjb.net/)

[بقايا نزف]

يعطيك العافيه مطنون على الموقع.......

بس ماحطوا طريقة المطازيز..........


غدينا نتدرب برمضان.......

اختك
بقايانزف

[المحايد]

طيب يا جماعة الاخت الاصيلة تعبت على هالموضوع
بس ماعنده احد
عطونا طبخات واشرحوه

[فريـــد]

طبخة سهلة وبسيطة وتدل على اني لاادخل المطبخ إلا اذا صرت ضايع!!

الطبخة هي كالتالي:

علبين فلفل (حبحر)
طماطم حبتين ( العدد حسب الموجودين)
بصل مقطع (مهب مقطع اربع)
مقلى ( يفضل مقلى تيفال) عشان ماتنزلق الطبخة منه
وقليل من الزيت(ياليت يكون زيت العربي وتفوز بالجائزة وتدعي لي)
تضعهم على النار وتحركهم لمدة قليلة.. (لمين تتعب ايدك)
وتشتري خبز السلمان(بريال) ويستحسن (الخبزالرهيف)

وبالهناءوالعافية

* تحذير: انا غير مسئول عن اللي يبزع ويغير او يخطئ في اعداد ماسبق

* الرأس بعد الإنتهاء من تناول الأكلة سيكون هكذا::confused:

- رمضان كريم-............ دمتم بخير

[القعقاع]

:D :D :D :D

[احلى عالم]

ليش ماندخل !!!!!

بالهنا والشفا ..................

[الاصيلة]

أخواني وأخواتي

الحنجرة الذهبية والله ونعم وربي يخليك للوالده والتكتكه جايه انشاألله

غالي الاثمان والله ان طبخاتك صعبه ونتائجها تخوف

بقايا نزف احلى واسرع حلى والله يكفينا شر العجز

المطنون فهمنا فهمنا وأبشر بطبخات رمضان وأشكرك على الطبخ والنفخ
المحايد والله أنك بردت تسبدي وانت اللي فهمتني ويكفينا منك التوقيع الرائع

تقهو جرب الطبخه وننتظر النتيجه على احر من الثلج

اطلاله وين المشاركه وما لك عذر دوري اي شي
من بريده سم الله وكل بيمينك وكل مما يليك والله يحييك


المحترميييييييييييييييييييييييييين
السلام عليكم ورحمة الله وبركاته
أشكركم كثيرا على الاضافات الرائعه وكثر الله خيركم يالطبابيخ
واللي فيكم يعرف المرقوق بلحم الغنم أو الجمل
بس يضبطها 100%
الرجاء
تزويدي بها لأنني أريد تجربتها
وبالتفصيل

ولكم خالص تحياتي

**الاصيلة**

[المبتهج]

[SIZE=5]الظاهر الحريم هالزمن ماوراهن طبخ الله يخلي امينة(الشغالة)
:cool:

[احلى عالم]

بصراحة مرقوق بلحم الغنم مانعرف حنا يالعيال كيف نسويه .

بس اقولك امي طول الله عمرها تراها تعرف طبختك تمام بامكانك مراسلتها على مسنجرها الخاص ;) ;) ;)

[سكر وملح !!]

الله يرجش يالأصيله ، ذبحتينا بهاالرمضان ،، هذى مشاركتش الثانيه عن اكلش بدا بطني يقرقش انا ما افتح الجهاز الا بعد السحور , ( حرام عليش ) , وشبش على الأكل , خلي طبخاتش بعد الرمضان الله يخليش , وبعدين اذا قالولش بعض من شاركش بموضوعش ان مقاديرش زينه ، تراهم ماعندهم ماعند جدتش ، مثلي , ومعهم خواتش اللي شاركنش .

خوذي وصفتي الخرافية :-

(1) ملعقتــــن شـــلخ
(2) 2 كـــــوب شلولخ
(3) اربع حبات شمروخ
(4) نصف كيلو الشــرخ

ضع المقادير السابقه تحت نصف قالب ثلج تحت درجة بروده ميه تحت الصفر لمدة خمسين سنه , ثم يطلع بعد ذلك اكله بس بلأحلام .

اخـــــوش ،
اخوكم الصغينون اللي يحبكم كلكم

شوقر وملح !!

[عبدالله30]

بسم الله الرحمن الرحيم

الاخت الاصيله 000

كل هالبلاوي تعرفينه وأنتي غير ماهره !!! ايحاء غامض ! ماالفائده ؟؟
لاأدري !!!


أثنين مكعب ماجي !! سمعت ان كثرت الماجي تسبب الفشل الكلوي 000 هذه حقيقه 0

رز بسمتي !! طيب اللي ماعنده الا ابو كاس يصلح ؟

مشكوره اختي 000 انت في كل مكان وحيث تكون يكون الابداع 0

[الاصيلة]

بسم الله الرحمن الرحيم

الظاهر أن العيال دخلو والبنات برا
لهاالسبب ماشفنا لا مرقوق ولا قرصان

المبتهج ** نوعا ما لكن ماهي كل البيوت

من بريدة **والله طيب قل لأمك الله يخليها لك تعطيك المقادير والطريقه وانت جبها لنا

سكر وملح** مشكور وماقصرت لكني ما ادري أنت من الجنوب أو جنوب الجنوب ه وطبختك تدل على خبرة كبيرة ماشاألله عليك

أخي عبد الله30 **الفشل الكلوي الله يستر منين تجيب هالاشاعات
ياخيي ترا ما سمعنا بهذا من قبل

وعلى شأنك ابقدم لكم طبخة رززززززززززززز تاكلون أصابعكم معاه

وعلى فكره مجرب قبل يومين فقط وما هو انا اللي طابخته

وبالعافيه
ولا تنسون المرقووووووووووووووووووووووووووووووووووق

وهذا الرزززززززززززززز

الرز الهندي..
المقادير:

3 حبات بصل مفرومة 2فص ثوم مفروم كأس شعيرية مكسرة صغير كأس جزر مبشور 3 ملاعق زبيب 2 ملعق صنوبر ملعقة فلفل أحمر بودرة ( حسب الرغبة) ملح "حبة ماجي 3أعواد قرفة ملعقة بهارات مشكلة 4 كاسات رز بسمتي منقوعه ماء لسلق الرز. زعفران منقوع في ثلاث ملاعق ما حار.

الطريقه:
يقلقل البصل في الزيت حتى يصفر يضاف الثوم ويقلب قليلا تضاف الشعيرية وتقلب حتى تحمر ثم يضاف الجزر والصنوبر والزبيب والفلفل الأحمر وملح وماجي والقرفة والبهارات وتقلب في الزيت قليلا ثم يضاف ثلثي كأس ماء حتى يغلي ثم يرفع عن النار. يسلق الأرز مع ماء وزيت وقرفة وقرنفل وملح خفيف نصف سلقه ثم يوضع نصف الرز على الخليط السابق ويقلب ثم يوضع النصف الآخر بدون تقليب ويرش بالزعفران ويترك على نار هادئة جدا لمدة نصف ساعة.ويقدم مع أطباق اللحوم.

والسلام عليكم

**الاصيلة**

[سكر وملح !!]

شكرا للرد ,

انا من الدرة , من اولاد علي , من وسط بريدة , حبي الأول والاخير , لكني مولود وعايش بالرياض . للايضاح جرى نشره .

[القعقاع]

عندي طبخة انما ايه


وهي
1-ارفع السماعة
2-الو كودو
3-واحد وجبة كودو الشهيره
4-بابا الحساب 30 ريال



امممممممممممممممممممم
:D :D :D